طلعة رائعة حول رفض النواب علاوة المعلم
فاسبعطَعشْ اثنعش امن الفين @@ واتسع طعش اجتمعت سبعينْ
من نوّاب الشعب ألا بينْ @@ اللِّ ناجح بالقبايلْ
واللِّ ناجح باطلْ باحكٍينْ @@ لَصواتْ افزٍفرتْ لكٍْوايلْ
مافيهمْ حدْ إفاصلْ بينْ @@ الباطل والحكْ ؤ كايلْ
عنْ كلْ امنادم منهم لَينْ @@ اتميلْ الريحْ إيجِ مايلْ
واعلَ حقوقْ المسلمينْ @@ اتشوفُ دهراً متحايلْ
موجبْ ذَ عنهم متَّحدين @@ اعل رفْض اليومْ امسايلْ
زيادة طبيبْ امسيكينْ @@ تعبان ؤ عركُ يسَّايلْ
مايكدرْ باط إغَمَّظْ عَيْنْ @@ بيه الخلقْ اعليهْ انزايلْ
وارْحايلْ، راعِ ذاكْ إنِينْ @@ هاذَ مشْيولْ ؤ ذَ شايلْ
واعلَ ذَ صابرْ ، للتَّحسينْ @@ يتحَرَّ ، فَيَّامْ اكلايلْ
نتوَقَّعْ ننزادْ ابميئين @@ من للُوفْ ؤنصبَحْ شايلْ
راصْ انعامَه، نشرِ وَتَّيْنْ @@ وانكَدَّسْ فالمالْ الطَّايلْ
غيرْ اصَّ تصويتْ السبعينْ @@ رافَض ذاك ؤ دونُ حايلْ
وافطَنْ رَفضُ زيادَه كانْ @@ يرجاهَ كرَّايْ أدَيْدانْ
الحَرْ اتشوفُ ماشِ زانْ @@ ما تَحْتُ يكونْ انعايلْ
فُفْريكْ افباديَّه جِعانْ @@ لُكِيلْ ألّا ما يُخايلْ
وإظَلْ امصَنْكٍَرٍْ فالحًمّانْ @@ يشْرَحْ والرَّاصُ متْفايلْ
وإِكٍُولْ إدورْ ألا يزْيانْ @@ حالِ ،ذَ الحالْ افْطَنْ زايلْ
لاهِ ننزادْ ، ؤ موريتانْ @@ صلحتْ ، فرظْ انسومْ اشوايلْ
نحلبهمْ، وانعَدَّلْ مَكانْ @@ نسكنْ فيه ، ؤلانِ جايلْ _
_ خَيْمتنَ لِ عنهمْ عِمانْ @@ مانِ طافكٍْ باطْ ازوايلْ
وافذَ خاظْ انْ البَرْلمانْ @@ ارفَضْ ذاك ؤ دونُ حايلْ
منْ ذُ ظركْ النوابْ أخيرْ @@ حَدْ إِلَوَّدْ للبَدايلْ
ذاكْ اللِّ وَحلُ فيه الخير @@ ماهُ من شِيمُةْ لَوَايلْ.
كتبه تحت وقع الصدمة :
المنتقى ولد ميلود
